Kaitieur's response to the crime chief's evaluation of the crime situation:

Bandits hit short time place fuh nutten

Thiefing get so rampant that these days people don’t care wheh dem rob and who dem rob. De bandits don’t care who see dem. Dem boys suspect this since de group rob dem money changer in America Street. To this day de police ain’t sure if dem hold de right people.
De other night a group of dem go to a soldier house. De man house got grill. De bandits force open de door and when dem meet up wid de grill, dem rock it till it fall apart. Firemen does talk bout how house so heavily grilled that dem can’t enter. From, now dem should employ bandits.
Well dem bandits tek things to a new level. Dem got people who does get away fuh some cozy time. Some of dem men got wives and some of de women got husbands.
Dem boys know de story of de husband who going to meeting and de wife who going either to she mother or she friend. Well some gunmen threaten even that li’l cozy corner pun de East Coast. This place got branch at Agricola. De bandits walk in and one stand up by de door. Up comes two people and de one by de door chase dem away.
De people get vex and dem tell de police who tun up and ketch all de bandits. But wha people didn’t know was that some policemen been in de place too having a nice time.
Dem boys seh that if was a robbery dem woulda clear out a long time ago but all of dem had interest in de activities in de place. Some of dem ask fuh de keys fuh de room and set up a peep show. In fact, de story was so nice that when de police arrest one of dem he tell de policeman to wait because he coming just now.
De Crime Chief seh that crime gone down, that it ain’t so bad but from wha dem boys seeing, things bad. Every day is a robbery and de victims often don’t got nutten.
People know that dem bandits want money fuh Christmas. All of dem coulda get a job to ketch dem hand instead of robbing people and spending Christmas in jail.
Talk half and watch how you visiting de short time place.