Dem boys seh…Sonny mek a bad move

People does move from one thing to another. Long time people use to move from beast to priest because when dem done do all dem wickedness and can’t survive in that same environment dem use to tun priest fuh hustle wid de collection.
Well Sonny move from businessman to bandit because de Feds looking fuh he. Like he play chess. He mek a bad move. This was a man who just had to walk in some airport and go pun a plane. He didn’t need money fuh travel. Dem boys seh that he running and he probably dig a hole in de ground because nobody can’t find he.
De man was doing good till some people in Guyana decide fuh show he nuff money and ask he to front fuh dem. Sonny tek de bait. Now dem Guyanese deh looking fuh he too. Dem claim how Sonny disappear wid dem money and he tek it de same time de hospital people claim that de same Sonny tek dem money.
Because of Sonny dem put a hold pun de Marriott project because dem don’t want nobody else run way wid dem money. De trick is to mek it look like if is foreign people money. If a man want wash he money all he got to do is pretend to borrow some money then he gun pay it back and use he money. People gun think is de borrow money.
That is wha Sonny do when he lodge he deposit money wid Scotia Bank. Right away he borrow money from de bank. But dem boys want to know if he pay that back already or he Guyana friends pay that off already.
Dem boys seh that is a good thing de people ground de plane because Sonny mighta sell it.
Talk half and help de Feds find Sonny.