A man sell 60 firearm licence in one day
Mar 12, 2018 , https://www.kaieteurnewsonline...-licence-in-one-day/
When people wuk long and hard, dem does hope fuh get dem pension and gratuity. De gratuity is a lump sum dat does help dem set up demself fuh de life outside de job. Well a man wuk long and hard. He do nuff corrupt thing when he was wukking and he collect nuff money.
But dem have greedy people and one of dem just retire. He had a ceremony and farewell but before he lef, he issue 60 firearm licence in one day. Dem got people who apply because dem got genuine reason but dis man give de 60 licence to people who not even Guyanese. Nuff of dem can’t speak English. Nuff of these people didn’t even have Guyanese ID.
Dem man collect $60 million in one day. Dat was before he farewell but dem boys not calling any name. Dem ain’t even saying dat de man give licences to Brazos or Venoes or Chinese because dem does get blame fuh targeting people.
Now Ramjattan got to check who get licence recently and he got to mek he decision. But de man collect he money and he visiting de casino regularly. He was one who use to put people in court when dem do something wrang. Now dem boys waiting to see if anybody gun put him before de court just like how some Americans want put Trump before de court.
Dis man cut down support to Guyana and now he even tekking way money from dem. He ban catfish from Guyana. De Americans know dat Guyana catfish come from fresh water. De one dem got come from farm wheh people feed dem wid all kind of steroids and other things dat does affect people.
When dem Guyanese who use to sell de catfish seh Trump hear only one thing and because he old and can’t eat it or even use it, he decide to ban it. He hear cat and fish. He didn’t connect de two.
Talk half and watch how gilbacker gun get cheap in Guyana.