Basil de Willie got a problem
Basil de Willie always giving people something to talk. He like de gyal from Agricola who does sing de song how she give dem more to talk.
He go in de court de other day and get into trouble wid a judge. De thing reach de stage wheh de judge didn’t even adjourn de court so de witness lef standing up in de box and de clerk and all of dem still sitting down.
Normally, de judge does set de date fuh de next court appearance. That didn’t even happen. Basil de Willie mek that happen.
Dem boys seh that just before de judge close de court Basil de Willie ask him a question. Is that question start de whole story. Nobody ain’t want to believe that wha dem read is de truth; how somebody threaten somebody wid death.
Basil de Willie call a press conference to explain heself but it look like if he mek matters worse because he number one enemy pick he up an even challenge he. This enemy is de Chat-3 and seh he been in de court and he hear every word.
Well dem boys seh if he hear wha he think Basil de Willie tell de judge and if Basil de Willie hear wha he think he tell de judge it gun be one big dem seh, he seh story. Of course one of dem boys seh that Basil de Willie was talking about he obeah powers.
But then again, if he was such a good obeah man he woulda win some case that he lose unless obeah is not fuh de courts and if obeah is not fuh de courts then it can’t trouble a judge.
One thing certain, de judge at de centre going to de court of appeal fuh Basil de Willie. Dem boys waiting fuh de outcome.
Talk half and watch how trouble mek Basil eat pepper