Dem boys seh…De Rat put property in Donald mother name
De Rat use to play Santa Claus. Santa does give gifts to everybody and he does keep de best fuh de good ones. De Rat different. He does give to heself and he friends and he does keep de best fuh he best friend, Bar Bee.
Santa does give a lot of things to good people and nutten to bad people. However, De Rat does do de opposite. He does give nutten to good people and everything to bad people. He does give de most to de worse ones.
Dem boys find out only yesterday that he give Bar Bee three radio station, not one, when he give everybody else one. He give Bar Bee de Santa complex, nuff duty free concession wid de same complex. He give Bar Bee de contract all de years fuh supply drugs. People pocket billions over de years in that deal alone. Then he give Bar Bee all de contract fuh every printing job fuh de state of Guyana.
Dem boys now finding out how much property dem swap. Dem swap state property fuh private property right across Guyana. Brazzy tell one of he friends and de same friends tell dem boys.
Tek that prime Camp Street property when Belvedere use to exist. That get swap for 103-acre state land.Dem swap a empty lot pun Main Street fuh nuff state land and put that same property in Donald mother name. Dem buy it in de name of Olive Branch to fool people and hide de transaction. Donald mother name Olive.
Dem boys fuh a moment think was Donald own. But de poor man didn’t know nutten. Now he wondering who else name dem use. He seh that if dem buy in he name he gun tek de property.
Dem tek de state land at Sparendaam wheh dem had de radio transmitter. Dem boys find out that dem tek de transmitter and all. That is wha dem using fuh one of dem radio station.
Talk half and if you know wha else dem tek, whisper in dem boys ears
