Bobby de landlord of Guyana can tun landlady
Monkey always know wha limb fuh jump on. That is an old saying. When de Pee Pee Pee decide to shy way all de people who can supply drugs fuh no reason whatsoever, dem know wha limb dem jump on. Dem jump pun Bobby limb. Dem boys hear that he is de man fuh de Pee Pee Pee. When de party want anything, and dem boys mean anything, dem just got to whisper and Bobby is there cause he is de man. But he wasn’t always de man. Somebody had to mek he de man and dem boys know is de man who resemble de devil responsible for Bobby being de man. De Rat, who resemble de devil, give Bobby nuff thing. Dem didn’t have moral and scruple and principle. Dem do wha dem want and when dem boys talk dem run to de court, crying how people b….. dem. Dem eyes pass people. De Rat mek Bobby de Lord of de Land or Landlord of Guyana. He now own almost everything in Guyana. Dem boys hear that he plan fuh own Uncle Glenn and Uncle Adam house through de courts. But dem boys got a message fuh he and all of dem. When Bobby move in dem house dem boys plan fuh lie down next to dem right pun de same bed. After de first night sleeping next to Uncle Adam and Uncle Glenn he gun tun Landlady of Guyana. The Pee Pee Pee already give the okay to Landlord Ramroop, to not only sell dem billions of dollars in drugs, but to sell it at any price he feel. This is total eye-pass! De way how dem went about giving Ramroop exclusive rights to sell drugs is like Guyana got 10 restaurant and dem force you to buy from only one. You don’t have no other option and you got to eat de food whether it cook yesterday, de day before, last week or last month. You also got to eat de food if it ain’t got salt, sugar pepper and you got to shut de f*** up. And pun top of that you got to pay whatever price de restaurant bill you. Ramroop rich now. He mek dem boys remember de rich man who pass and see some poor people eating grass at de roadside. He stop and ask dem wha dem doing. Dem tell he that dem hungry and that dem poor and dem ain’t got money to buy food. De rich man tell dem fuh come in his big fancy jeep. Dem tell he that dem neighbor poor too suh he tell dem to call fuh de neighbor too. He pick up all of dem, carry dem at de Sanata complex and tell dem to eat, that de grass more young hay. Talk half and wait to see when dem gun eat out of a shine metal bowl.