Brassington refuse locals in Marriott deal

Scampishness is nah you mattie. Old people seh suh. Old people also seh that mouth open and story jump out. Since last year Brassington seh that he was looking fuh investors who coulda put in de Marriott. Is two kind of investor he wanted. One of dem was to put in US$8 million and own 67 per cent equity in de hotel. De other was to put in some money through a loan that some people sub dem money and put in as one. It tek Brassington a year and a day fuh get any of de two of dem. One businessman, when he hear bout putting in US$8 million and getting 67 per cent shares in de hotel he go to Brassington office and seh that he ready fuh put he US$8 million. De man tell dem boys that Brassington tell he how he foot shaat. But every day since then, de man reading de paper and seeing that nobody tek up de offer. Well he want fuh know how he foot shaat. He go home and measure he foot and he see everything alright. He now want to know if Brassington mekking he a jackass or if Brassington is de jackass. De man seh that he still interested in putting in he US$8million and he waiting fuh Brassington call him. De waterfalls boss man did tell Ashni Singh that he had some money that he did want to put in de Marriott seeing that dem was looking fuh investors. Ashni more than disrespect de boss man. He tell he “Well you know Glenn, if a man got experience in hotel business we gun have to tek he in front of you. You know bout newspaper and he know bout hotel so he would be able to mek a better contribution than you. De boss realize that Ashni was mekking him a jackass. Is then he realize that Ashni and Brassington want dem own people. And is not dem boys seh suh, is Brassington seh suh. Now dem boys seh that dem notice that de people who Brassington and Ashni pick shame. Dem frighten fuh show dem face much less put dem money. De businessman who want put he US$8 million and de Waterfalls boss man who want put he two cents, ain’t frighten fuh show dem face or put dem money. Talk half and wait fuh de answer from Brassington and Ashni.