Corruption is de disease that gun eat out Soulja Bai
Some people are hurt by words, some by action and some by silence and de truth. De Chat-3 and Lolo Feel is two who hurt – one by action and one by words. De Chat-3 and Lolo Feel hurt by dem own action and de truth.
De Chat-3 is accused of stealing law books and dem boys believe he do it. Because de thing expose in such a manner that mek he look bad, he lashing out at everything and everybody.
Then you got Lolo Feel. He too hurt by he own action and de truth. Dem boys expose all de skullduggery he and others did at de election place. Dem boys hope is only money dem do de skullduggery wid and nothing else.
So Lolo Feel fighting back thinking that because he pull de ads he gun hurt dem boys. A matter fact, dem boys didn’t even know till a sister company call dem and ask dem. That show that nutten dem do can hurt dem boys, who will continue to talk de truth.
Dem boys tempted to believe that somebody should check de books to see if de record show that dem give three newspaper de ads when in fact dem only give two. Things can happen deh and pocket can full.
But dem boys not impressed by money, followers, degrees, or titles. What impress dem is honesty, kindness, generosity, integrity and humility.
People still waiting de outcome of de audit wha Sharma carrying out on dem no-good radio, pliers, toner, battery and other things wha cost couple million reaching billions.
When dem boys ask, de Cow Doctor and Lolo Feel didn’t seh a word. In fact, dem boys couldn’t find dem.
All this skullduggery happen in Jagdeo time, and when he lef ee print lef behind. Now dem deh all over. Since dem boys turn dem seeing people ducking and hiding. Some of dem hiding outside de country. Is a disease.
Dr. Ngozi Okonjo-Iweala once said, “Corruption is a disease that eats away at de foundation of people’s faith in government. It undermines the stability and security of nations.”
It gun eat out Soulja Bai. Dem boys believe he is not corrupt, but he don’t have immunity.
But dem boys went to church yesterday and said a special prayer fuh dem two, de Chat-3 and Lolo Feel. What de prayer is dem gun find out.
Talk half and Guyana must pray fuh all dem corrupt souls.