Dem boys seh…Donald got to sweep now
When people seh that new broom does sleep clean dem know wha dem saying. And that is wha people expect every new broom fuh do. Of course de other part of de saying is that old broom know de corners.
Donald is a new broom but he ain’t sweep yet and Ralph mek that point in de papers. Of course, Ralph did intend to be de new broom, but de old broom—in fact two old broom at de time, mek sure that he didn’t get a chance. One old broom, Jagdeo, know wha Ralph woulda do and that woulda spoil everything that he put in place.
So Ralph sit down in he corner and he see wha dem boys was seeing all de time. He see how one old broom, Jagdeo, stack up all de old things that he like. Donald come in and was like if he frighten jumbie. He didn’t touch de old things.
But dust does fly and when de dust start fuh fly poor Donald didn’t have a kerchief big enough fuh keep de dust out he face. That is why whenever he plan something he always find that something always block de plan. One plan he had was to stop corruption but de dust get in he eye and cloud he vision. Ralph sit down and see. Now he talking.
He talk bout de two-point plan that de old broom had. Hear Ralph. “From de time he, Jagdeo, settle in de presidency and realized its potential for greatness and wealth he put in place a two-prong strategy.” He collect some business people and mek dem rich through state contracts.
But is de second prong that got dem boys talking. Ralph write how Jagdeo break down any independent thinking and resistance to himself. That is wha Donald ain’t do because de resistance that he getting is from wha Jagdeo put in place.
Dem boys seh that Donald got to sweep and sweep now otherwise he goose gun get roast. Jagdeo done got a plan fuh put somebody fuh replace Donald and this is eye pass. Donald got to sweep now before dust blind he and mek he useless.
Talk half and give Donald an apron fuh start sweeping.