De auditors owe de Govt tax
May 06, 2017 , http://www.kaieteurnewsonline....ors-owe-de-govt-tax/
When people complaining that de government taxing dem too much, you have people who complaining that only some people paying tax. De truth is that dem who claim that dem getting too much tax is de people who never use top pay tax.
Dem boys know that nuff of dem big ones use to dodge. Dem never use to accept cheques because that gun show up how much money dem collect and how much tax dem got to pay. Dem only use to deal in cash.
Another set use to bribe dem Customs officers and don’t pay de tax that dem should. Now de situation spread to GWI. Dicky Van West seh that he ain’t able tax nobody suh all de talk Jurdon talking bout VAT he refusing to tax de people water.
But de people so kakish that although GWI not taxing dem all of dem hollering how dem got to pay tax pun water and light bill.
But that ain’t de only story. Dem boys ask Soulja Bai if he did collect tax from de people who conduct de forensic audit. Right away some people decide to pass on de word that Soulja Bai looking to collect from Chris Rum, Goolsarran, Parmessar and Hindsey.
De name who get call suddenly begin to criticize Soulja Bai. All of a sudden dem finding fault wid de very audit dem conduct. One of dem give Jagdeo so much information that Jagdeo recommend him to be GECOM chairman.
Dem boys expect to hear more criticism, especially since Soulja Bai refuse to accept de nomination to GECOM.
Talk half and hope dem pay de tax.