Dem boys seh… De Bees gun bend over
September 15, 2013, By KNews, Filed Under Dem Boys Seh, Features / Columnists, News, Source
When dem boys read bout de hole in de Supenaam stelling right away dem remember Dave Martins and de Tradewinds when dem sing bout de young lady. Dave sing every time she bend over he could see Arizona. Well de people using de Supenaam stelling sing that every time dem bend over dem could see de whole Essequibo River through de hole in de floor.
Robeson was quick to tell de world that is Bee Kay build de stelling and Bee Kay seh that is Robeson wid he spite mek de stelling bruck. But people done singing bout de bending over. Dem seh that de Rat and all de Bees gun be bending over but de difference is that dem ain’t gun see nutten; dem gun feel.
People already know that dem got to go to jail fuh all de wrang things dem do to de people of de country and in jail is nuff bending over. Brazzy is de man who deh in de thick of things and he gun be in de thick of bending over. He got people now telling dem reporter that dem got to send dem questions in advance.
When de questions come then Brazzy, de Rat, de Chronicle and de Mirror, dem lawyer and all of dem sit down and wukking out wha answer to give. It ain’t got to be de truth. Now dem boys seh that if people ain’t got nutten to hide dem ain’t got to screen questions to mek sure that everybody tell de same lie. Simple question got dem asking fuh time to answer.
People ask who is de investors fuh de Marriott and Brazzy and he scampish colleagues dem want de question in writing. Who is de board members in GEA and dem want that question in writing.
That is why when people ask Brazzy alone de question he quick fuh seh not he because he got he hand, he foot he mouth and he behind in everything. When he get corner he does holler how he can’t answer because de issue is confidential. Who hustling fuh do business and wouldn’t talk?
Talk half and watch how all de Bees gun bend over.