De coalition playing three card trick wid Guyana oil
Jul 07, 2017 , http://www.kaieteurnewsonline....rick-wid-guyana-oil/
Soulja Bai and de coalition govt playing lotto wid de people oil. He was a li’l boy when he start playing lotto. In fact he start wid three card and end up buying tickets.
Sandy give him some money to pay de light bill. Instead, he tek de money and buy a lottery ticket that offer a brand new car as de prize. When he go home he explain to Sandy what he did and she cut he tail fuh wasting de money.
He cry and he go in he bed. De next morning when she wake up and open de door, outside de house was a brand new car. He and she start fuh cry because de car was from de power company. It did come to cut off de lights. That is how he get a second licking.
To dis day he does try to pay all dem bill and he never gamble back, till now. Is only a few weeks ago dem boys notice he start back gambling.
ExxonMobil come to him wid a three card trick. This fuh you, this fuh me and de rest fuh de Guyanese people. Then dem tell him don’t tell nobody and that’s why this thing so secret. Nobody hearing anything from de coalition govt bout all de skullduggery wha ExxonMobil do all over de world.
After dem boys expose de things ExxonMobil do, Soulja Bai come out to seh dem listening and watching. But dem boys want remind Soulja Bai and de coalition three card is a game—de more you watch, de less you see. De less you see is better fuh we.
Dem seh dem listening. Experts had two forum yesterday and de talk a lot. Dem talk how Guyana can protect itself from de shaft and not one of dem from de govt been deh.
Dem boys notice is not only de govt people was absent from de forum, but also de Pee Pee Pee was nowhere to be seen.
Talk half and tear up de three card and de players.