De criminals must rob Rum Jattan and See-all
Dec 17, 2016 Dem Boys Seh, Features / Columnists, News 0 Comments
Guyana got some sleepy police. Dem sleep till dem getting fat. And dem boys seh dem sure that all de police still sleeping because of de robberies that going on.
Rum Jattan mek big talk about putting a lid pun crime. He plan woulda wuk if he did get some old lady and give dem a piece of wood to walk de streets. Instead, he put nuff police pun de road and de crime get wuss.
Nuff people get dem December salary and dem boys read somewhere,
“Blessed are those who spend their entire December salary in December for they shall know de true meaning of endurance in January.”
But you have those who didn’t get to spend it because they were robbed of it at de car parks, pun de road, from de three-card people. These are de people who got to cuss Rum Jattan and See-all.
Things meet de stage wheh de criminals robbing all de people who waiting fuh transportation at de park and people just watching and doing nutten. Even police watching and doing nutten.
De three-card people actually tekking money out of people hand and putting it pun bet. When dem done rob de person dem slapping de people behind dem head.
Dem boys seh that dem never see nutten so. Rum Jattan promise to bring out de soldiers fuh joint patrol. De soldiers disappear and de couple police who trying getting cuss every day.
People calling de police station and no police coming. De criminals get so bold that de other day one of dem rob some people and when he pass by de police roadblock he lef a raise wid de police.
De situation sickening and all this happen because Soulja Bai open he mouth and tell de police that dem mustn’t rough dem criminal. From de time he seh suh all dem li’l boys who just lef school go out and collect guns and rob people.
Even one of dem who get bail fuh attempted murder tun round and rob another man. Nuff people gun get a rough Christmas because of de young criminals. And Rum Jattan and See-all ain’t doing nutten.
Talk half and hope that de criminals rob de two of dem.
