Dem boys seh…De opposition confusing demself
Dem had a lot of noise about conflict of interest because Shaatie wife get confirm in she wuk at Office of de Auditor General. Well Uncle Donald now seh that de opposition don’t know wha dem want. He think that all of dem mad. “
This woman been doing de wuk fuh seven years, even before she husband tun Minister. She was acting. When de opposition find out, dem claim how de government got nuff actors and wouldn’t appoint de people. Now that dem appoint de people de opposition mekking noise.
Dem boys seh that Uncle Donald get vex and tell de opposition fuh mek up dem mind. “Wha you-all want?”
He going to de Stadium fuh de Building Expo and he stop fuh tell dem boys that de opposition confuse till dem confuse demself.
One Moses open he mouth and talk bout conflict of interest. Prak pick up de chant and de next thing dem know is everybody singing that tune. Harman and Norman, Carberry and Cranberry, Backer and Packer and even Roop and Soup singing de tune.
Dem boys remember when Winston Murray was there he didn’t see conflict of `interest. When Volda Lawrence was there she didn’t see conflict of interest. How now dem others seeing conflict? That is wha Uncle Donald want fuh know.
“Me nah Jagdeo. Me ain’t tekking nonsense.” That is wha he now telling all of dem in de opposition. He seh that if he use to cuss he woulda cuss all of dem but he know that is wha dem want fuh get mo fuh talk.
Dem boys willing fuh bet that all de talk bout conflict gun now done because dem got de Building Expo. Uncle Donald bet Prak Ramjattan gun talk how de thing too expensive and how it use too much lights.
Talk half and confuse de other half.