De prison wardens getting vex
Jul 30, 2017 , http://www.kaieteurnewsonline....wardens-getting-vex/
Is only a matter of time before dem prison warden get vex wid all de nonsense dem prisoners been carrying on. De thing start wid a fire in Camp Street jail last year. All dem hundred plus years de jail been there, nobody ever light a fire.
Up comes this set and dem decide that dem very bad suh dem light a fire. Eighteen prisoners get killed. Some dead in hospital and some of dem roast suh bad that dem family couldn’t even recognize dem. De government get a shock. Li’l bit more and some Ministers and prison wardens woulda tek off dem pants and bend over to please de prisoners.
Dem boys seh that is only because people talk mek that ain’t happen.
But de prisoners see a loophole. That is why dem bun de prison again.
Nobody ain’t dead this time but dem de government and de prison warden nearly bend over backwards again just to show de world that dem is nice decent people.
From de time that happen Jagdeo seh that de prisoners got de government by de tail and swinging dem. He seh that de government show de prisoners that it was weak. De prisoners move to Lusignan and is more fire. Dem roast cow and sheep; dem try to bun down a shed and things like that.
Old people seh don’t push people. One set of prisoners get put back in Camp Street and dem start to bruck down de walls inside de jail. Dem couldn’t start fire because de prison warden tek way all dem lighters and matches.
But there is a saying that when something nice do it again. De prisoners feel nice when dem bun down Camp Street jail. Dem feel nice when dem behave bad and dem feel nice when dem hear that a set of dem get away. That is how dem start to behave bad last night. Well dem boys seh some of dem in pain. Dem get some bullet.
Dem boys seh dem lucky is not de hard stuff that de souljas does use.
Sixteen of dem get shoot and couple of dem in hospital.
Dem boys want to warn dem that de next time is real bullets gun fly because people who guarding dem fed up.
Talk half and hope dem prisoners behave because people vex.
