Source

De shoes does always be more tight when it deh pun de other foot. Dem boys pass by Freedom House de other day and dem hear nuff crying. De government send home some people and all of dem run to Donald to complain.
Some of dem get send home because dem never use to do any work; some get send home fuh not going to wuk and some get send home because dem was more politician than Granger.
De thing that mek dem boys start fuh laugh is when Ten Edghill complain how everybody quiet. He claim that Kwame get knock off and Human Rights, Red Thread, SASOD and de Women Lawyers Association ain’t seh a word.
Everybody who get knock off was a witch, according to Donald and de Pee Pee Pee, because all of dem seh that Soulja Bai people hunting dem. A reporter ask if Kwame was a witch, too, and Edghill seh he didn’t ask.
Dem boys hear when another reporter ask if de Pee Pee Pee didn’t do de same thing when it come into power in 1992. Right away de whole Freedom House, including Jagdeo, seh that Soulja Bai do wuss — he knock off Kwame.
Imagine dem had 20 people who was wukking wid Donald and all dem had to do was read Facebook. Rohee seh that Soulja Bai had no reason fuh knock dem off.  Dem had some engineer at Skeldon who didn’t have to do nutten but collect dem pay when de month come. Dem shoulda get promotion. That is wha Anil seh.
De next thing is that Donald shoulda still be de President; Rohee shoulda still be de Minister of Home Affairs, Ten Edghill shoulda be de Minister of Finance wid Ashni and Priya shoulda be de Minister of Education.  Dem ain’t in de position no more because of witch-hunt. Soulja Bai chase all of dem.
Talk half and wait fuh hear bout de two who get knock out yesterday.