Dem ain’t got no money tree

Some people believe that money does grow pun tree. That is why a man can send a lawyer letter asking fuh de Waterfalls paper pay $13 million to he foundation. Dem boys seh that if de man did ask fuh a li’l donation dem coulda understand.

Imagine couple company decide to help sponsor de anniversary celebration and when dem boys check dem does hand over one million and so. De big telephone company hand over $2 million. That is why dem boys couldn’t understand how this man could ask fuh $13 million.

Is de same thing wid another man who got to be greedy. He sue de paper and he get $4 million. He had de nerve to appeal de decision. He go to de Court of Appeal and tell dem he want more. Believe it or not, de Appeal Court give him some more. This time dem boys appeal. After this appeal dem ain’t got no more.

Dem boys know that money to some people is like water to duck. It always deh. That is why de forensic audit expose so much. That is why Jagdeo build a mansion and he can’t even sit down inside because he does hear jumbie talking in one corner.

And de thing that got dem boys shaking dem head is that when people got nuff money dem can’t sleep good. Some of dem does get sick wid bad heart and burn stomach. Even Jagdeo did get sick wid fever and de runnings. Money does mek that happen.

Anyhow, back to de $13 million. Thirteen is an unlucky number and dem boys believe in bad luck. So it would be nice if de big man turn de number around, That is when people gun know he mekking joke, just like de other one who want $100 million from Freddie Kissoon.

Talk half and wait fuh de money tree.