Dem boys seh … Blows mek a bishop tun politician
May 01, 2017 , http://www.kaieteurnewsonline....shop-tun-politician/
Is not everybody who holler “Lord. Lord” is a priest or a pastor, just like how all who dress like a Moulvi or a pandit is a good person. People does always think that dem people is good people. Of course, nuff people find out de hard way.
Dem boys hear bout a man who live at Tuschen who somehow convince some women who can’t get pregnant that he can get dem pregnant. Of course, nuff man does know what to do, but this man didn’t even do that.
He collect money from a woman who hear bout him in de States and he tell de woman that she had to come and see him. She come and without touching she how man does touch woman to get dem pregnant, he get she belly big.
De woman now complaining how dem doctors in de States tell she that she don’t have no baby in she belly.
De woman claim how de man put a demon in she belly. Is one year and de demon ain’t coming out. De woman complaining but dem boys can’t understand how de woman husband allow she to fall fuh such a thing.
But dem got some husband who know how to deal wid people like that.
One day this husband lef and go to wuk and de wife invite a certain pastor who is a politician. Everybody know him. It so happen that while he in de house de wife hear she husband coming and she tell the pastor to hide in de roof.
He hide till he ketch cramp and decide to come down just as de husband sitting down to eat. He announce how he is Angel Gabriel and how he bring good news. He tell de husband how he is blessed and how he got a blessed home. He talk and talk.
Dem boys hear de husband get up and pick up a piece of wood. That is when de bishop try to go through de door but de husband then tell de bishop to go out just like how he come in through de roof. And de blows start.
Dem boys seh dem never hear an Angel change he tune so much. And then dem remember de Pope. De Angel now walking wid Jagdeo all over de place and every now and then he does limp from de blows.
Talk half and beware of all who pretend that dem good.