Dem boys seh… Brazzy hit de Waterfalls paper wid a lucky ‘13’
July 29, 2014, By KNews, Filed Under Dem Boys Seh, Features/Columnists, News, Source - Kaieteur News
De other day dem boys seh that monkey know which limb fuh jump pun. When dem old people come up wid that saying, dem didn’t tek Brazzy, de fat crook, into consideration.
If dem did do that dem woulda seh that gorilla know which tree fuh jump on. He weight is ten times de weight of a monkey. Brazzy is not a monkey.
He send 13 lawsuit yesterday alone to de Waterfalls paper. He nah know how much luck he give dem boys, because 13 is dem boys lucky number. Two judge know that, because dem award dem boys two $13 million already.
Dem boys know that dem talking de truth and no judge gun rule ‘gainst dem.
He is also a man who when he go in de witness box, does get amnesia. Dem boys watch he many times in court. All de mouth he got in he office, pun de road and when he walking wid de Bees, does get small when he got to answer questions before judges.
Dem boys can’t wait fuh these lawsuit come up before a judge. Dem boys lawyers gun mek he get runnings. Dem and all can’t wait. By de time de case done people can’t call he fat crook no more. People got to call he fine crook.
De Hanna Rebel is another one. People in he vehicle, PRR 7498, pass by de Waterfalls paper, not one time but two times in three minutes.
Dem boys see dem de first time when dem lower de window, slow down and tek out photographs. Like de photos nah come out good, because dem mek another spin and come back.
This time when dem meet in front de Waterfalls paper dem stop and tek out more photo, then speed away like thief in de day.
Dem boys got a message fuh de Hanna Rebel. Dem don’t have to tek de photo in secret. If is photo dem want from de paper, dem boys willing to give more than de photo of de building and vehicles. Dem boys willing to pose naked fuh dem, in front of de building if that photo gun turn dem on.
Talk half and send back dem quack fuh more photo.
