Dem boys seh…De audit find Bam-bye money

When Soulja Bai announce that he gun start fuh audit all dem place that tek money from de treasury and from de people and can’t account fuh de money, Donald tell de Hard Times paper that he ain’t frighten. But when he seh suh de reporter he was talking to hear he belly rumbling. Irfaat been wid he at de time and like name and nature he start fuh release gas. De search ain’t gone nowhere yet and dem find $10 billion already. Somebody did hide de money in some old account. Wha dem does do is hide de money in dem old account till people forget. Then dem does go in and tek de money and nobody don’t know. De Auditor General was always calling pun dem to close dem old account but dem use to refuse. GT&T and Digicel report brisk business last night. De news come out that dem boys find de $10 billion. Suddenly everybody inside calling one another. People call de old Finance Minister who call a former president who cuss de whole team fuh being slack wid de money. Dem boys certain that by weekend de team gun find more money. Dem already see people writing check and passing it to one another. One man collect people money fuh house lot and he try fuh bribe he boss. De boss send back de money to him. Dem boys know de story. People want to know how de $10 billion ain’t disappear. De people who was trying to move it couldn’t ship it to de States and dem couldn’t send so much to India and China because talk fuh rain and talk fuh sun, dem two countries does jail corrupt people. De next set of money deh hide up in Bank of Baroda and in Republic Bank. Chris Rum was waiting fuh a chance to do a forensic audit. He try to start one wid de Sugar packaging plant and Rob de Earth don’t him. Now he got a chance fuh do all dem audit, including one pun Jagdeo. Talk half and watch how dem gun find money wha some people hide.