Dem boys seh…De Dees really stupid
Some leaders believe people stupid, that dem does just jump whenever dem talk. That is de case of some more Dees. David Hinds seh he is a leader and he got Desmond Trotman behind he.
Desmond seh he is a leader too. And to crown it off, dem had de brainless Uncle Fred Dee who going fuh a brain scan fuh check to see if he got any brains.
Dem call a protest at Buxton fuh block de road. Dem believe that once dem talk, de whole of Buxton, Lusignan and Annandale woulda come out because dem seh suh. Well de morning of de protest nobody ain’t tun up.
But de day before Brumell who in charge of de police did seh that dem leaders should come to de front. David Hinds claim how Brumell give he a death threat because de man want he in front of de protest.
Dem boys had to laugh. De same eleven who plan de protest was de only people wid dem placard. David and Desmond dem pushing people in front. Dem stay at de back.
De people inch halfway in de public road and dem boys seh if you see how dem run when dem see de minibus coming wid speed. David and Fred Dee run de fastest. That is when everybody know that David is a bluff.
Dem boys seh that dem know that de Dees is stupidees, that de Bees gun always run ring round dem. After all Bees before de Dees. De Dees could never outsmart dem. Dem boys seh that people need leaders who are de Aaze.
Tek Fred Dee who always running behind de Dees. Fred Dee seh he need brain scan. Gerhard convinced that Fred Dee mad suh he recommend that he go to Bhairo Harry, another mad man. Fred Dee agree and he going and tek it. Dem know he mad a long time.
Dem boys didn’t realize dem got so much stupid Dees.
Talk half and watch de Dees.
