Dem boys seh…Guyana is one big hustle

Is who tricking who when dem talk ‘bout development? And when dem talk ‘bout development is who development dem talking ‘bout? Fuh a long time dem boys use to sit down and watch how de development thing was going. And it was easy. A man buy or rent a bulldozer and a hymac then he tender fuh a contract to build road. He ain’t got to know nutten bout road building. Then he tender and one look at he name gun mek he get de contract. The first thing he gun do is apply fuh ah advance then he gun scratch de road. After a while de man gun pack up and lef de road. It don’t matter if de road done or not, he gun mek some money and he guh get other contract. Sometimes he gun have to do slapdash wuk which gun bruck up after three weeks. But dem boys seh that de big ones know more about development suh dem does undertake big developmental programmes. That does involve nuff money. Dem ain’t got to do slipshod wuk. All dem got to do is price de project higher than de real price and walk away wid de extra money. Then dem gun share some money wid de contractor by giving he contract that he can’t fulfill. But de real big ones don’t have to worry. Special cheque does write out to dem and deposit in special account.  De more dem get is de more dem does want. Dem boys watching Rob de Earth, Shaaty and all dem Bees wid four eyes now, because de ting getting more sweet. Is sheer wood dem studying. Long wood, short wood, fat wood, fine wood…any kinda wood could pass. Nobody don’t care. They allowing another bee, Bai Shaan, fuh rape de country, and all of dem now turning dey back because dem frock front full and running over. Dem boys want Donald and de Pee Pee Pee fuh stop talking ‘bout development. That is a old con word for looking fancy. Let dem just tell de people de truth. Guyana is just one big hustle Talk half and watch de hustle continue.