Dem boys seh…President Jagdeo shameless
Email sent successfully. Some people name does tell wha dem is. Tek de name Ali. When dem woman miners check pun some Chinee who wukking dredge in de bush de people tell dem that Ramzan Ali bring dem fuh wuk. Well dem boys want fuh know since when people got to bring in Chinee fuh operate dredge in de bush. Guyanese de doing that all de time and when dem did want fuh expand dem call de Brazilians. But this man bring Chinee. People want fuh know if he and Irfaat is family. But then again it could be Irfaat heself who bring dem Chinee, because he don’t have no shame. He is not de only one who don’t have shame. Bharrat Jagdeo don’t have no shame, too. De man put a really fancy package fuh he pension just before he lef de government. One man who write a letter to de press seh that Bharrat is not a shameless person, he is DE shameless person. On de other hand Joe Singh is a man wid pride and shame. He wukking wid de telephone people and at de same time Ohh Pee hire he as an adviser. When a man ask Parliament how much money dem contract worker does get, Joe Singh name come up. Joe send a letter fuh explain that although dem got he name pun de pay sheet, he never tek a cent from Ohh Pee. Well dem boys want fuh know who does collect he money when de month come. But Bharrat Jagdeo is another kettle of fish. He not only tek de pay as President, he also mek arrangement fuh tek de pay when he lef de wuk. He put together a package that giving he money fuh security, fuh lights, fuh telephone, fuh drivers, fuh maid, fuh gardener and money fuh travel. And de same Bharrat Jagdeo lef some pensioner wid $10,000 a month and dem got to pay dem own light and water and telephone bill from that. De man ain’t got shame. No wonder a mayor had to call he gutter rat. Without shame he go back in time and change de law fuh he friend collect de Santa complex after de Waterfalls paper expose de lawlessness. Today he got people wasting time in Parliament fuh review de package. A foreign Finance Minister wife get ketch wid nuff money. De Minister resign because he shame. An act goes much farther than a word will ever travel. That is wha dem boys seh. Talk half and don’t shame fuh lef de other half.
