Dem boys seh…Luncheon kiss up de US ambassador

People always know that Guyana is a circus and circus does got nuff clown. De government make itself a clown when dem revoke Glenn Bradbury visa.
When somebody tell dem bout de backlash that could reach dem and all dem family, dem backpedal. All de visa that dem and dem family got woulda get revoke.
Some of dem wife and children tell dem that Guyana ain’t got nowhere to go fuh entertainment and excitement. That is why dem got to go to de ABC countries. And de ABC countries is not what Neil Kumar call Argentina, Brazil and Chile.  ABC is America, Britain and Canada.
Guyana does get plenty free money from de ABC countries and nuff of this money does find its way in some of dem pocket. Suh is not de visa alone mek dem backpedal.
Rohee was de first one to talk fat and he didn’t paint he head properly. Luncheon talk fat too. He didn’t comb he hair as usual. And then de biggest clown, Donald, go to Berbice and cuss dem Americans who put he in deh anyhow.
Thursday when de big man from de US embassy drive in to Ohh Pee was a different story. Luncheon change he tune. Dem boys never hear he sing so sweet. He sing, “I love you; you love me; we are a happy family. Wid a great big hug and a kiss from me to you. Won’t you say you love meeeee tooooo.”
Dem hug and kiss and seh that de man can stay in Guyana and do wha he want fuh do. This clownish attitude in de government trickle down to City Hall.
Hammy de Red, de other clown, swear in another clown to tek  over de position of a sitting clown.
Woww. Only in Guyana. De country got so many clowns soon some of dem gun spread out in de regions.
Talk half and replace dem clowns.