Dem boys seh Magistrate send home Trini who kidnap eeself
Dec 19, 2018 , Kaieteur News, https://www.kaieteurnewsonline...i-who-kidnap-eeself/
Two people going to court today. One of dem is a MP and dem boys don’t mean Music Player. He is a Member of Parliament.
A woman seh he cuff she pun she breast. De police who investigate de matter had a hard time writing de charge because de MP deny that de woman got breast. He seh he might a knock she pun she chest.
De woman get charge too. She get charge fuh kicking him between he legs wheh all men got wha cricketers does play wid.
She also refuting his claim because she seh he ain’t got wha man got between dem legs.
Dem boys seh de magistrate will have a very difficult time convicting any one of dem especially when dem claim this one ain’t got any of de two ‘Bs’.
Dem boys hope that this case don’t end up before de same magistrate who try de case wid de Trini who come to Guyana and kidnap heself.
Throughout de trial de Trini was on bail and could not leave Guyana.
Dem boys seh something funny happen because as soon as de magistrate find that de Trini could be guilty of de crime of kidnapping heself, she tell him he can travel to Trinidad fuh Christmas.
Dem boys find it very strange and very funny. People tell dem boys this is not something normal. De magistrate signal to de Trini that jail in de making then she tell he go home to Trinidad.
Dem boys want ask de magistrate if she expect him to comeback knowing that he is not a witness to a crime, and that he did not commit a crime against anybody. Is just de state accusing him of committing a crime against himself.
Suh who would go home to dem country and come back to go to jail when dem is de only witness, de accused and de victim?
That is a question dem boys want de magistrate to answer.
Talk half and dem boys hear de Trini smiling in Trinidad fuh Christmas.