Dem boys seh…Rob de Earth must lead by example

Some people really bareface and brazen. Imagine Rob de Earth got de nerve to tell people to declare every ounce of gold dem mine. He go in de bush and he tell de miners to declare everything. Dem boys want tell he to lead by example and declare how much kilogram he done collect. And dem boys ain’t talking bout coke, dem talking but gold—raw gold. He must also declare wha he collect fuh dem tons of claim wha he give out for a fee. When he do that then he can tell people that dem must come clean wid gold declaration. If he is a leader that is wha he must do. He must tell some of he colleagues that dem must declare dem bank account. Jenny must declare she account including de one in Canada. Bharrat Jagdeo got to declare he assets. He is one who never had nutten before he tun President. Now he got nuff land in prime real estate and he got de one at Pradoville. That is only wha dem boys know about. Jagdeo heself had a heck of a time fuh get he Cabinet colleagues to declare dem assets to de Integrity Commission. Dem boys seh that when as a boss you can’t get you followers to listen to you is because dem have no respect fuh you since dem see you as no better than dem. It is like a thief telling all dem thieves that dem is a thieves. Let dem tell Donald that dem wouldn’t declare dem assets. Bobby got assets but he not a government official. Brazzy got more assets than any of de government officials. Jagdeo is third behind he because Brazzy is first and Brazzy is second. A lot of place all over town had Valentine’s lunch and dinner. Some go fuh lunch and some go fuh dinner. Brazzy, that fat crook, went fuh lunch wid dem crooks in de government. He didn’t realize how much he pay because that didn’t come from he pocket. Is when he go back fuh dinner wid he wife that he realize how much it cost fuh eat on Valentine’s Day.  One dinner ticket was $7,500 on de menu board. When he and he wife finish eating, dem receive a bill fuh $22,500 which is de cost fuh three people. Is here Brazzy start fuh question de thing. De manager look at he and smile. He didn’t want de female companion to feel bad suh he whisper in Brazzy ears. “You alone is two.” Talk half and let dem declare wha dem got.