Dem boys seh…Rob de Earth tek de Chinee thing and now he can’t talk
Nutten does happen by accident and people don’t give nutten fuh free. When de Chinee Ham Bassadah call de Waterfalls boss man and invite he to dinner, de boss man smile. Dem boys didn’t know that Uncle Glenn had so much teeth. That was eight years ago. De Ham Bassadah feed he like how you would feed an elephant, then ask he if he want to go to China fuh a holiday fuh free. When de boss man hear FREE he eyes light up. Right away he tell de Ham Bassadah “No problem.” De Ham Bassadah fix de date and three weeks later de boss man had to pack he suitcase. But before he lef, de Ham Bassadah invite he to a meeting. That is when he get de envelope wid he ticket. He tell dem boys, “When I opened mine at the airport I see 1000 US. When he ask de Chinee people from de embassy tell he that is pocket piece. He show all he teeth to New York and right through to Beijing. Then he start fuh think. He couldn’t figure out why dem give he a free ticket, free accommodation, plus transportation and pocket piece too. But money is money and freeness is freeness. And he wasn’t alone. Dem carry a reporter from de Big market paper, one from de Chronicle, one from de government TV, and others . Dem also carry Rob de Earth. Was a big Guyana posse ! Even after that dem carry Jagdeo, dem carry Donald dem carry Hap New people and dem carry anybody who accept de invitation. In China, de people treat the boss man like king. He had two ladies visiting he room every night. De first night dem come knocking pan he room door he think somebody setting he up. He ask dem wha dem want and dem tell he that dem come fuh do massagee. He eat, he drink and he tour. He was on top of de world. He claim how de Chinee people is de best in de world. When he come home he start talking Chinee. Every Chinee he meet, he bowing he head and saying “Shia, Shia.” Dem boys learn that is a Chinee greeting that means “Thank you thank you”. He didn’t know that there was heavy grease behind all this. De Chinee had a plan fuh b**** he and dem who get de free trip and de pocket pieces. Who gun spend US$1,500 a day pun a man and don’t expect something from anybody who is not he kind or he family? He find out de other day. Suddenly all dem Chinee company come and put a b*****ing pun Guyana. De boss man and all of dem who go to China was suppose to shut dem mouth. Rob de Earth and de man from de Chronicle and de government TV who been can’t seh a word to this day. In fact, de man who was at de time wukking wid de Big Market paper now wukking wid de Hard Times paper. He can’t talk and he tekking de b*****ing and he got to smile. De Waterfalls boss man giving dem back dem money because he seh that he cant tek no b*****ing. But because of Rob de Earth, Guyana got to keep tekking it. And is nuff of dem doing it to Guyana. Is Bai Shaan who tekking out timber like people tekking lice from an infected head; is de Marriott people, and is dem who getting Guyana Passport fuh a fee; dem who getting fuh set up all dem shop wid cock goods and dem who tekking out de gold. Poor Guyana got diarrhea. De timber and de gold passing out like water through a pipe and de people in power can’t seh nutten because dem put out Guyana fuh prostitution.
Talk half and call in de Americans because Guyana is now a trafficking in person victim.
