Dem boys seh… Soulja Bai got a ring in he nose
Aug 22, 2016 , http://www.kaieteurnewsonline....t-a-ring-in-he-nose/
Everybody does try to protect dem own. Fowl does try to protect she chicken; mothers does protect she children and politicians does try to protect dem own. But sometimes dem does expose demself.
In de Olympics in Brazil a race walker couldn’t protect heself and people see a brown stuff running down he legs. He finish de race but nobody even go near to him. He tell de reporters that he had a gastrointestinal mishap. That is word for wuk belly.
Dem boys seh Moses, Trotty and Joe Lin had de brown stuff not only running down dem legs but all over dem face. Nutten get involve in a deal that smell like de brown stuff and de smell disturb Soulja Bai. He order an investigation and ask Moses, Trotty and Joe Lin to conduct that investigation.
De three of dem come up wid an excuse that got people accusing dem of all kind of thing, from lying to protecting a scamp just like demself.
How dem can justify why Nutten decide to rent a bond in Albouystown?
Dem talk bout traffic jam at Diamond but is de same Diamond Bobby got he bond and he never had problems moving de drugs.
When USAID build de bond dem tek everything into consideration and dem didn’t even see any problem wid traffic. Dem didn’t even see a problem wid de electricity although Guyana mek blackout a national symbol.
Now dem boys believe that Trotty was de one who tell dem that de electricity at Diamond not as good as de electricity in Albouystown.
Badal ain’t seh nutten because he know that de three Musketeers –or Mosquitoes—talking sheer brown stuff.
But he tell dem boys that it look like de three Zika Mosquitoes leading Soulja Bai by ee nose. Dem boys prepared to lend Soulja Bai a welder’s cutting torch fuh cut that ring because things moving from de ridiculous to de impossible.
And all this time de man who start de stupidness, Dr Nutten, ain’t saying nutten
Talk half and throw some water pun Soulja Bai to mek he wake up.
