Give a man an inch and he gun tek a mile. Because Soulja Bai is so decent people think he stupid.
Some people now talking bout legalizing ganja. Is alright if dem was only talking but dem decide to approach Soulja Bai wid de action. One of dem even offer de big man a spliff so he can see how nice de thing is.
Soulja Bai watch him and tell him don’t mek a mistake and light it. Dem reporters like to ask questions and of course dem ask Soulja Bai wha he think. De paper got de story.
But de people who talking bout legalizing ganja should realize that all dem gunmen gun fail a drug test if de police only test dem.
Uncle Freddie seh that de conclusion is that ganja smoking is wha does create criminals. That is why de Waterfalls boss man don’t tolerate dem people round him.
Dem boys remember de time when he send he entire press team to get test. One of dem think he smart. He send he small brother. Then he carry de result to de boss man. He get a surprise when de boss man tell him that he just get fired. De test show that he use cocaine. He didn’t know that he brother smoke cocaine.
Dem boys seh that Soulja Bai got other problems. Saturday night one of he Ministers go to Pegasus. De man couldn’t lef pun he own steam. He security had to lift him out de place. Is a good thing no gunman didn’t attack de place.
Is a good thing de Minister get drunk before two in de morning because de police woulda have problems arresting him. He couldn’t stand up and he didn’t even know he name. Soulja Bai ain’t get de news yet because fuh sure he might think about banning likker.
Talk half and keep an eye pun de Minister round you likker.