Dem boys seh… Soulja Bai, Rum Jattan leadership role in question
De new govt is like a chameleon. That is a lizard that does change it colour to suit any situation or condition. If it stand up against a yellow wall it does tun yellow.
When it deh near a scamp it does change to look like that scamp. That is what dem boys hear de gov’t heading to.
Nuff of de Cabinet people can’t talk freely. A set of dem in de Cabinet telling dem to hush up and shut up when dem open dem mouth to talk about corruption. Dem get orders not to speak to de media.
Dem boys beginning to get a change of heart wid Soulja Bai, de lead man in Hap New and Rum Jattan, de lead man fuh Hay Heff See. Dem boys honestly believe that both men were straighter than arrow, but wha dem hearing under de grapevine dem boys beginning to think different.
And de problem come about because couple of dem talk to de Waterfalls paper how de Finance Man was refusing to tek action against Brassington.
Dem boys hear how he tell Soulja Bai that Brassington is an asset, a church bai, and de best thing after slice bread come to Guyana.
Dem boys want to believe he was an asset, but only to Jagdeo, Ashni, and dem boys want believe, de Finance Man.
De same people ain’t only get ban from talking to de media, it look like dem get ban from answering de telephone.
Dem boys seh when dem been in de opposition, dem use to call de media to talk. Dem use to ring down all de phone. When dem didn’t get de reporter in office, dem use to call dem at home. Dem mouth run like when baby got diarrhea.
Now like dem eat green guava and get constipated. Dem don’t answer de phone and dem don’t return phone calls. And is not dem don’t like to talk, but dem boys believe that de power done fly to dem head.
De office got a lot of P and de P stand fuh nuff things, including money. Dem boys don’t want call name because nuff of dem is lawyer and some is liars. Dem boys now finding out de difference between dem.
Talk half and hope dem boys wrong about wha dem hearing from inside de Cabinet.
