Dem boys seh… This time nah lang time

July 27, 2015 | By KNews | Filed Under Dem Boys Seh, Features / Columnists, News, Source

A Minister suppose to go to court today and everybody want to know is who. Dem boys hear bout de only one who Donald knock off.

This was de Minister wha did get vex wid a woman because she ask he if he didn’t have wuk to do. At de time he was protesting because Jagdeo get charge.

He threaten de woman and because he was a Minister no police ain’t charge he fuh threatening language.

Under Jagdeo and Donald, no Minister ever get charge, no matter wha dem do. But as old people seh, this time nah lang time.

And dem boys waiting fuh see some of dem big ones get charge fuh fraud.

Dem get ketch and de police got de evidence. This time nah lang time.

But sometimes some things does tek a lang time because some police ain’t wake up and realize that things change.

De Prime Minister seh that he see a man casing he house. He call Sean Hinds name and that happen two weeks ago.

Up to now nobody ain’t get hold. Is either de police ain’t respect de Prime Minister or dem sending a signal that dem ain’t believe de Prime Minister.
In fact, dem never even mention de story.

Dem boys believe is because de Prime Minister seh that another car tun up after.

He seh that this car belong to de Chat-3. Now if de police only issue a call fuh Sean Hinds, why dem ain’t issue a call fuh de Chat-3 too?

People ain’t stupid. Dem ain’t so stupid like de Regional Chairman who want schoolchildren to come from all dem schools in de river in de North West fuh line de road because he got an inauguration.

No Regional Chairman ever had an inauguration but this one seh that he just as powerful as Soulja Bai.

De next thing is that he gun want de GDF to do a flyover. And who paying for it? Not de government! Suh, if he want he inauguration, he better start collecting money from all who support him. This time nah lang time.

But then again, money shouldn’t be a problem because he leaders got more than dem can spend.

Talk half and remember that this time nah lang time.