Dem boys seh…Brazzy learn Ratamatics
When people go to school dem learn Maths and Science and English and all dem things. When dem come out of school dem can further dem studies and learn further Maths and things like that. Brazzy been to school and then he go to high school. He learn more than Maths.
He go pun de TV de other day and he start fuh talk bout NICIL. He tell everybody how NICIL ain’t got to put money in de Consolidated Fund but when it feel like it can give de government some money.
Dem boys listen and dem couldn’t understand de Maths he give when he start fuh talk how NICIL does send de money to Government. Dem boys seh that instead of Mathematics he learn Ratamathics. De man twist everything just like how rat does twist he tail.
But Brazzy didn’t stop there. He claim how he did hire Chris Ram fuh audit he books. Ram didn’t tell people but from wha Brazzy seh it look like if he involve.
Brazzy shifting blame and he want people fuh believe is that Ram thief de money from NICIL.
He don’t sleep these days because he never believe that he Brazzy woulda deh in this position. All d time he spend and give away money like if was he own. Now dem boys in control he got to answer and all of a sudden he see jail.
He talking but wha he talking only sinking he more and more. Is nuff stupidness. Like wha de Chronicle print. Imagine de Chronicle claim how Hen See Hen got to cut down expenses and increase revenue.
Now everybody know that is how business does run. But de Chronicle put de thing like if is de greatest word of wisdom and like if it is something new.
Dem boys want to know why Donald got dem at de Chronicle still close to de paper. He should fire de Manager, de Chief editor, de senior reporter and everybody who had something to-do wid that article. He should also shutdown Hen See Hen . Dem wasting time. Is a good thing de opposition tek way de money because dem woulda waste that too.
Talk half and don’t waste de other half.