Dem boys seh…Nuff people vex wid Jagdeo
Some people got power and some does pretend that dem got power. When de one wid de power talk nobody can ask one question. Some Customs people did get knock off ‘bout three years ago. Bharrat Jagdeo knock dem off.
Dem had big investigation, but de people was innocent. Dem boys seh that Jagdeo get vex, but he spiteful. He don’t like know that he wrang. De Board clear de men and tell dem fuh go back. De men dress fuh go to wuk. Uncle Donald hear and he ain’t seh nutten. Dem boys seh that he approve.
Jagdeo hear that de men going to wuk and he show that he got power. He tell dem not once he alive. De men ain’t get back de wuk.
Is de same attitude mek two koker attendant flood de city. Jagdeo mek dem people get frustrated from de time he hold back de taxes and mek de council couldn’t pay de workers. De koker people decide that de best thing is fuh drink and get drunk.
Yesterday morning Sam and Robeson get a shock. When dem go to wuk dem had more water than corn flour. Sam shorts get wet. De people in Kingston had it bad. One man roll off he bed and nearly drown. Dem chair spoil, de salt water short circuit dem fridge and all of dem decide that dem carrying dem furniture to Jagdeo house because is he mek dem pump attendant drink and get drunk and forget de koker.
Imagine that Uncle Donald lef to go to a meeting in New York. As soon as he back tun, Jagdeo kavakamites in de government give he best friend $1.3 billion fuh buy drugs. Dem do de thing secretly and when dem boys talk everybody hear when de friend seh that is a secret order, that everything does got to be done in secret.
Dem boys know fuh sure that when Jagdeo and he clique going to jail it ain’t gun be no secret.
Talk half and keep de other half a secret.
