Dem boys seh…Uncle Donald proclaim Wakenaam a tourism island

Town people always believe that country people stupid. Uncle Donald pick up Toolsie and go to Wakenaam fuh a programme call Wakenaam Nite.  Every night is Wakenaam Nite because de place black like de devil behind.  De people got to live without lights fuh long period because de generator does wuk and stop.
Uncle Donald go to de island and mek speech. He talk how Wakenaam special, how de people now got airstrip. But everybody know that no plane ever land pun de strip and de only reason dem build de airstrip is because dem did vote money and no airstrip didn’t build.
De media talk and dem shame. Out of de blues dem build de airstrip but nobody ever talk ‘bout wheh de money come from. Anyhow Uncle Donald seh that Wakenaam is a tourist resort.
Dem boys want fuh know since when is a tourist resort when people busy running away. De island got more empty house than a condemn jail. De Waterfalls boss man even build a house there and that house empty.
Anyhow, Uncle Donald know that Wakenaam is a place wheh people want to go. He talk how people gun go to Kaieteur and when dem hungry dem gun go to Wakenaam fuh lunch and dinner.  He got to be dreaming. Who want see Wakenaam?
Anyhow he claim how Toolsie born pun de island and that alone gun mek it a tourist resort. People gun visit to see cow and cow dung and pothole in road and blackout and mosquito. Dem gun tour de empty house and dem gun visit Toolsie birthplace. Is real bogus business.
Talk half and visit Wakenaam fuh vacation.