Dem boys seh…Uncle Donald proppa frighten

 
Is one thing when people eye open and dem can’t see. Uncle Donald deh in that position. Dem boys seh that de man ain’t even done one year in office and he got all this trouble round he head. De sugar union people grumbling, de nation grumbling, and Bharrat laughing.
Is like when li’l boy create problems fuh big man. That is wha Bharrat do fuh Uncle Donald. He tie up all kind of contract that he know gun cause problems and he lef Uncle Donald inside. Well people asking question and is like when a man buy a house that somebody else build. You can’t ask that man fuh explain how dem construct de foundation or how dem put on de roof. He didn’t do it.
Well Uncle Donald got to talk ‘bout how people thief de laptop that he didn’t buy; how dem got to explain de sugar packaging plant that ain’t wukking and how de hospital tek expired sanitisers from Food fuh de Poor and when dem get ketch dem want blame Food fuh de Poor.
Dem boys want to know if dem couldn’t read, if when dem mek de arrangements de Food fuh de Poor people didn’t show dem de sanitisers.
Uncle Donald can’t answer dem questions and that is why he trying fuh get advisers. But that can’t help he because de same advisers was Bharrat people and dem job is to mek sure that Uncle Donald walk in Bharrat shadow.
That is why de one eye one who does call heself Peeping Tom get vex when de Waterfalls reporter decide fuh ask all dem hard question. De reporter nearly jook out he other eye. Dem boys seh that he and Freddie got something in common.
Poor Uncle Donald want to hold a press conference but he frighten. Imagine a man frighten in he own house. And Bharrat laughing.
Talk half and call some obeah man fuh Uncle Donald.