Dem boys seh…Croton oil and jumpsuit fuh de Bees

This is de season of giving and receiving. People who earn whole year does give back to de less fortunate. To give dem does extend dem hand fuh shake and dem does use de other one to present de gifts.
De less fortunate does shake hand too wid one hand and receive wid de other one.
Two different workers from two different work place was chatting. One seh that he boss man does only stretch he hand fuh shake but he don’t give nutten. He greedy and cheap. He and he family does tek everything.
De man seh that de boss man wuk he year guh, year come and don’t give nutten when Christmas time come. He seh that he woulda lef de wuk long time now but he can’t find another wuk and he got he pickney fuh feed.
De other man tell he that wukking wid a good boss man. Every year de boss man does shake he hand and give he a big bonus package. He does nice up he whole family.
He seh that de other day he see de Bees and de king Bee, (de big Rat) walking round and claiming how dem sharing de Christmas spirit. But dem didn’t have no spirits in dem hand. Brazzy, one of de Bees, got a lot of spirit in he belly while de King Bee and Bob-Bee got spirit of another kind. Dem is de most evil of spirits.
De man seh that he does tun sideways to stretch one hand out to shake de Bees hand, but he does keep one hand in he pocket to protect de li’l bit he got inside.
De man seh that when he got to meet de King Bee and Bob-Bee, he does keep all two hand in he pocket and pray.
Because of how dem cheap, mean and greedy, dem boys wish that today dem go to somebody who gun put croton oil in de food that de Bees got to eat. That gun bring runnings of another type.
Hope de Bees have a most unhappy Christmas and that Santa bring de pumpkin/khaki jumpsuits like wha de EZjet boss wearing in Miami now, and croton oil fuh all of dem Bees, including de King Bee, before 2013 Christmas.
To de honest, decent, and hardworking citizens of this country, dem boys wish all of you a joyful, blissful and happy Christmas.