Donald Bur-day come and gone
October 25, 2013, By KNews, Filed Under Dem Boys Seh, Features / Columnists, News, Source
Donald celebrate he birthday de other day and when dem boys check nuff people didn’t get invite. De man know that nuff people woulda want to show how dem is he friend.
Some of dem race fuh buy gift. Donald is a ordinary man suh he send back dem gift what all dem Bees send. One of dem even buy a car fuh Donald fuh show how much money dem got. Donald didn’t know who buy de car till he send it back and Barbie call fuh find out if he, Donald, didn’t like de colour.
Bee Kay send one of he Mack truck. Donald send it back too. Bee Kay call and ask Donald if he don’t like de size.
Rob Earth send gift too. He send a big gold nugget that he demand from a Brazilian fuh Donald. De big man send it back but Rob Earth didn’t give back de nugget to de Brazilian.
Dem boys seh that you can know a man friends buy watching who attend he party. Some of dem who attend wasn’t invited. Dem boys see Ah Kneel, Dem see Ass Knee, dem see Odinga but not Lumumba. Dem see Sam and dem see Hinds.
Dem had a special cake which Donald and he wife cut but dem nah get none. Brazzy and de Rat eat out all. Dem boys seh that dem wasn’t surprise because that is how glutton and greedy de two of dem is.
Dem couldn’t come out dem house. Is a good thing one of dem ain’t got wuk and one does come out and seh that he going to wuk. That is Brazzy who creating all dem deal. He mek de Man above show de nation de Amaila deal was suh scampish that he dry it up before dem come to paypah.
Talk half and lef dem in de hands of de Cree-aa-tah.