Dem boys seh…Jagdeo friend come out of jail
Dem change de name of de police force but de murders still going on. Three more people get kill in three days and dem boys want to know if de people in parliament gun target de Home Affairs Minister again. Is like if he is de man who committing all dem crime.
A woman move in a man house and de next thing dem boys know is that she tek a bellna and beat de man to death. People hear de man hollering, but dem didn’t know that is somebody did killing he.
Old people always seh that dead man tell no tales. De man can’t defend heself, suh de woman claim how he play fresh wid she. She is a big woman. De neighbours claim how dem never see nutten of de sort, but people in de village like de story, suh all of dem woman talking how de man was fresh. But some of dem woulda be glad fuh some of that freshness.
Then a youth man believe he was Django. He shoot a man and drive away. Of course he friends come up wid all kind of excuse, but de video show something else.
De story ain’t even done deh. De people ain’t even get a rest when dem hear that a man cut another man throat. Dem boys seh that de story sweet, that one man rich and de other man poor. De gyal like de poor man, but she mother and father like de rich one.
Dem boys seh that de parents didn’t have to live wid none of dem , but it look like de gyal try both of dem and she know wheh she happiness lie. Now she ain’t gun get none of dem because one dead and de other one gone running.
At one time man use to claim how dem have ten woman to one man. Dem boys seh that it look like reality now strike home. Dem got more man than woman in de world That is why people must get vex when man kill woman and dem must get more vex when woman believe that dem is man.
And while people thinking ‘bout that, one of Jagdeo friend come out of jail while some others waiting to go in. One thing is certain, this friend, Kerik, ain’t coming to Guyana again. He claim how is he padna in Guyana set he up, just like how he set up Robert Simels and mek he get jail.
Talk half and wait fuh mo’ set up.