Exxon got Guyana struggling wid dem pole
Mar 11, 2018 , Kaieteur News, https://www.kaieteurnewsonline...ggling-wid-dem-pole/
Some people would settle fuh anything. If you tek a man off de road who never sell a pound of sugar, or salt or a pint of oil, would you put him to run Courts?
Dem boys seh that is exactly wha Hay Heff See and Hap New do to Guyana wid Exxon and dem odda oil company. Dem never sell nutten yet Soulja Bai put Trotman, Harmon, Jordan, Gaskin, Patterson and Greenidge fuh strike a business deal wid Guyana’s wealth.
De world see de stick, de shaft or de pole Guyanese get through dem. De lead man was Trotman; he sign de contract and continue to seh things that disrespect de intelligence of de people of this country.
Only Friday he seh, “While you may have oil in de ground, you may not be able to touch it. So not because you found oil you have de right to demand high bonuses.”
Dem boys find that this is de height of stupidity. You can’t get more stupid than that. He talk like a man who accustom to put he mouth at a standpipe collecting water by de drips and de drops. Then somebody come in he yard, dig up he wealth and fling two bottles of water in he hand and he start jump fuh joy.
He don’t realize that de wealth that de man pick up can give him ten warehouse of drinking water, a waterfalls plus a lake.
Or you got de case of de man who does eat salt and pepper wid rice every day. A man come in he backyard, find gold and throw a piece onion in he plate and de man start jump up fuh joy. He don’t realize that wid de gold de man find in he yard, he could eat jumbo prawns, roast duck, baked chicken, and cheese cake fuh dessert. In fact, he can eat anything. He can even own KFC and Burger King fuh life.
Had they signed a sensible deal den every Guyanese woulda enjoy dem burddays like de Waterfalls boss man.
He celebrate he burdday in grand style, two days ago. He get nuff gifts. One of dem was a gift like wha Exxon give Guyana.
He think he get an I-phone from ee niece and get excited. When he open de I-phone box, he get a piece of pone—instead of phone, beautifully wrapped in foil.
Everybody laughing and saying de boss get a I-pone instead of I-phone.
Dem boys seh is a gift like that Guyana get from Exxon. Instead of I-phone, Exxon give Guyana I-pole.
Talk half and hope all who sign and mek Trotty sign that contract, can keep that pole among demself.