Dem boys seh…Florida doctor recommend sturdy plug fuh Jagdeo
Jagdeo is a man who cause Guyana to spend an enormous amount of taxpayers dollars to satisfy he extravagance and his private life. He use to lef this country many times in secret and when he come back he never even got to tell de nation wheh he been and how he spend dem money.
He carry Brazzy to China when he was to buy de coffee mill which dem seh is de Skeldon sugar factory. It never worth one-tenth of wha dem seh dem spend suh people know wheh de money gone.
He carry Ash Knee, Bobby, Manny, Samtani and many others to trace he family roots in India. De people in Guyana pay and is de Times of India mek Guyanese know wha happen.
He actually travel de world then he jump pun a plane fuh go to Kuwait. But de Kuwaiti boss man realize how Jagdeo spending poor people money and decide fuh tun he back when he, Jagdeo, meet halfway. De man tell he that he had meetings and couldn’t meet wid Jagdeo.
De Kuwaiti boss man didn’t know who he was dealing wid. Jagdeo insist that he gun continue the journey and that he don’t have to meet de head of state.
Dem boys seh that when de head of state hear that he still coming, he tell Odeen Ishmael that de answer is no and no means no. Don’t come here. Jagdeo tun back and come in de country quiet and nah seh a word bout how he get rejected.
Now he lef office and he gone back to he unreasonable, unconscionable habits. He get belly wuk and medivac got to come to carry he to doctor in de States. That trip cost de taxpayers more than $20 million.
De doctors in de hospital was dumbfounded and shocked when dem hear that Jagdeo come wid medivac. Dem was led to believe that de man was in a dying stage.
When dem examine de man dem had to ask he best friend Bobby if he, Bobby, is a doctor, if he couldn’t see that he coulda give de man two tablet, some neem leaf, some guava bush and a sturdy plug.
Jagdeo coming home tomorrow.
Talk half and keep far from Jagdeo.
