Green Jah and Rum Jhaat don’t stand up fuh no body

A Short Man man get vex one night in Parliament and decide fuh stand down because no body ain’t stand up fuh he. He try to get hard wid Mannish Chand, but he couldn’ta stand up fuh he self. De man so short, that even when he try to stand up fuh he self, Mannish Chand couldn’t a see, hear or feel he.

Green Jah seh when people stand up fuh Short Man, he does look more short, so people does still can’t see he. But FLAPNU got plenty people who can’t stand up fuh dem self, much less stand up fuh other people.

Green Bridge got problems standin up, just like Green Jah and Short Man. Short Man father See-Hen woulda stand up better than he even in he old age. Yuh woulda just had to pass round by one a dem school, give he a sun shades, and he woulda see all dem Hens.

People in de FLAPNU seh Green Jah don’t stand up fuh no body these days. So de Short Man ain’t alone. De old soldier runnin all over de country to see how good he can stand up. But nutten he try ain’t wukkin.

Green Jah finally decide to check how he poll can stand up by callin other people name. But he realise that other people poll standin up higher. Bis Ram had done tell every body that Jagdeo and Ramotar standin up higher than Green Jah and Green Bridge.

Even when Green Jah join he poll wid other people poll, it ain’t standin up enough. De last time Green Jah and Poop Narine join up dem poll, it still wasn’t high like Ramotar and Big Sam poll.

Ting-a-ling-a-ling…friend tell friend…mattie tell mattie! Green Jah now tinkin bout joinin wid Rum Jhaat poll. But when a You-G man do de test, Rum Jhaat and Green Jah poll still ain’t match Jagdeo and Ramotar. So Green Jah and Rum Jhaat got big problems wid dem poll, especially when dem have to stand up fuh people!