Guyanese tun second-class in dem own land
Jun 06, 2020 , Source - Kaieteur News Online - https://www.kaieteurnewsonline...ass-in-dem-own-land/
Dem Boys Seh…
We gat we own problems with de po-leece hay. Every day dem gat traffic jam on de East Bank Public Road near Houston and Mc Doom. Dem people wha providing services to dem oil company does deh moving stuff in some big truck and dem gat de po-leece stopping traffic so that they can get priority.
This is how dem oil company gat we like second-class citizens in we own country. Imagine if you gat a pregnant woman going to de hospital and gat to deh in dah long line because dem oil company and dem suppliers getting priority and po-leece escort.
De po-leece report how dem arresting people wha breaking de social restrictions. Dem does go in dem village and pull people out of dem yard on the suspicion dat dem people gat sport and dat them nah practicing social distancing.
But dem boys know dat de same po-leece is some of the biggest culprits when it comes to social distancing. On Thursday dem had wan big funeral on the East Coast. Dem had hundreds of people at the funeral home and plenty police went deh. In fact, de po-leece been directing traffick fuh de funeral.
Dem boys want to know how come dem big boys with dem brown clothes wha deh among de mourners was not interested in enforcing de social distancing?
Dem stop a driver pun de road and de officer tell he: “I smellin’ liquor pun yuh breath.”
De driver tun to he and seh: “Dat is because yuh nah practicing social distancing.”
Talk half and wait fuh see de damage dem oil company doing to de road.