Irfaat seh drop light bill, and he gun drop he underwear

Things never fail to surprise dem boys. Ever since Donald Dumb loss de elections he got some people who think that dem is de best thing since slice bread and because dem come out of office de whole country gun disappear.

All of a sudden Irfaat tun a big economist who got de cure fuh economic success. This man use Jagdeo newspaper to call pun Soulja Bai to drop light bill by 30 per cent. That got to be eyepass. This is a man who use to sell house lots fuh $59,000 and by de time he done,  he was selling de same house lot fuh $2 million. He been in power and people ask Jagdeo fuh lower de VAT; in short drop de VAT. Jagdeo tell dem haul dem ass.

Dem boys remember when Donald come in he set up a committee to review de VAT. He come out of office and de committee en  done de study yet.Jagdeo never drop de oil price. When de price get too high he drop de tax and as soon as de price fall he put on back de tax. He never drop de light bill but he want Soulja Bai to do that.

Dem boys seh that de only thing Irfaat, Jagdeo and Donald ever do was drop dem pants and dem underwear. Dem boys don’t remember if dem tun round after dem drop dem underwear.De truth is that some things drop. Gas price drop; light bill already drop because some people seeing rebate pun dem light bill.

And wha Jagdeo refuse to do Soulja Bai intend to do, that is, lower de VAT. Is de same VAT dem other boys use to get rich. A team tell Soulja Bai that he can lower VAT by 14 per cent. That mean that Donald and all of dem who done got money gun get more rich because de money can buy more things.

That is why dem boys seh politics is a hell of a thing. When Jagdeo and Irfaat been in power, VAT was extra money fuh de boys. Now dem out of power, dem see that VAT can fall.
Talk half and watch how Irfaat and Jagdeo stop driving by de jail.