Dem boys seh…Jagdeo and Bar Bee scared

Ever since de Waterfalls paper begin fuh talk bout corruption Jagdeo and Bar Bee start fuh get frighten. Dem try all kind of things fuh shut up de paper because dem believe that once dem get de people at de paper fuh stop talking dem coulda continue wid dem scampishness.
When things get hot fuh dem, dem start wid all kinds of madness. Jagdeo pull out some Wikileaks report and report how de Waterfalls boss man was a snitch. He and Bar Bee believe that dem woulda get people fuh hurt de boss man. Now dem bring back old news.
Dem bring back de Wikileaks report how de Waterfalls boss man was a snitch and how he visa get tek way because he stop. Three years pass and Jagdeo decide fuh bring back old news. He talk how de Waterfalls boss man get back he visa and fuh that to happen he had to start talking to de Americans again.
But dem boys know that de man visa never get tek way and if he was a snitch he woulda done talk bout Jagdeo and Bar Bee and by now de two of dem woulda deh in jail.
Dem trying everything fuh get de Waterfalls paper fuh stop looking at de thiefing that tekking place. But nothing dem try gun mek de Waterfalls paper stop talking bout de thiefing because dem thieves got to stop. Dem tekking poor people money.
Imagine dem talk bout Fine Man calling de paper. Dem boys seh that it wasn’t a secret.
Jagdeo call de same Waterfalls boss man and ask he wha Fine man tell he because he was scared. That is why he use to run out de country almost all de time. De Boss man never tell he and Jagdeo decide to run some more. He ain’t writing how de Waterfalls boss man prevent more madness.
From wha dem writing it clear that dem don’t mean to stop thiefing. And de Waterfalls paper ain’t gun stop looking at dem and if de Feds come de waterfalls paper gun even help arrest dem.
Talk half and know that de binocular gun stay pun dem thieves.