Apr 18, 2017 Source

Ah give you; you didn’t give me. Yes, me give you. No you didn’t give me. That is de nonsense that going on between the Pee Pee Pee and de guvament. And all because dem boys want to know wha happen to de Amaila Falls contract.
De whole Amaila Falls project start funny. Dem boys remember when Fip Motilall meet wid Sam Hinds. He did bring a group of foreigners. Couple years pass and Fip come back this time wid de whole kit and a promise fuh do de entire project although he never build a bridge across a trench.
IDB come in when Sithe Global come in. Then Jagdeo approach China fuh a big loan. De next thing dem boys know is that de project was to cost US$550 million. There and then Jagdeo should have had a contract wid de Chinese because dem did done agree on de money.
De IDB step in and promise some money. There had to be a contract. Sithe Global decide to put in some money too suh was three set of money. Then dem had to get a contract wid de contractor who was to build de hydro dam. Dem had another contract wid Fip fuh build de road.
Now de Chat-3 talking how he give de guvament de Amaila contract. Dem boys want to know which contract because is nuff contract.
Ramjattan mek nuff noise how he gun lock up people when he get into power. Now he, Moses, Harmon, and even Soulja Bai deh pun sheer stupidness and believe it or not dem boys woulda like to use a real Guyanese word. Dem got de Chat-3 hollering how he give dem de contract fuh de Amaila Falls.
Dem boys want to know if is only one copy dem had. Jagdeo had to have contract to give de IDB, de Chinese, Sithe Global and even de Norway people. All of dem mekking de people a skunk and nobody ain’t going to jail.
Imagine dem boys now saying that Jagdeo tell Brassington to hide de contract and lef de rest to him. Brassington do just that. And dem boys see him flying a kite in Miami. Don’t ask wha de kite mek from. De Amaila contract.
Talk half and get de guvament out of its slumber fuh deal wid dem wotless people.