Jagdeo investors stripping Guyana
Investors is people who does bring money into a country fuh help develop it, mek de people happy, and at de same time dem get benefits fuh dem investment. All over de world government does mek sure that de country and dem people benefit.
But this set wha Jagdeo bring come fuh strip de country naked. Now de nation seeing that dem bring extractors rather than investors. And Donald ain’t got no say, or suh dem boys want to feel. He sit down and tekking everything or suh dem boys want to believe.
From de time he tun president.
Well dem boys see fuh demself that every word that Jagdeo talk ain’t got no truth. In fact, from de time he tun president not one word that he talk was de truth.
One set building de Marriott and not one Guyanese wukking there. De airport project ain’t got no Guyanese and dem boys sure that if dem check Bai Shaan In dem gun find that not one Guyanese got any wuk. But then again Bai Shaan In is king. And dem behaving like one. By de time dem ready fuh lef de country dem done carry way everything. And all that was made possible because dem buy out people from top to bottom, including Jagdeo.
De words of Clintie Willie who sit down to dine at a Chinee restaurant in Middleton Street. He tell de Chinee man, “Don’t worry. By Monday morning you gun have all de approval pun you desk.”
Imagine fuh li’l food, Clintie Willie ready fuh sellout de whole of Guyana. Dem boys wondering how much pass under de table. He use to talk nice, nice to dem boys but when dem boys confront he, all of a sudden he cell phone never wuk back because he don’t answer dem boys phone call anymore.
Jagdeo join in and he start having dinner wid all dem Chinee investor every week and wid every meeting he fashioning deals. De latest deal mek sure that Bai Shaan In got unrestricted access to Customs and to de other people who dealing wid export. De first time some people decide to check Bai Shaan In call Jagdeo. Nobody ever question dem Chinee again.
Now dem tekking out de money faster than anybody can count and that is alright. Dem even getting other benefits. Dem getting Guyanese passport faster than even de people who born in de country. Of course dem paying more, but dem ain’t care. Dem boys hear that some of dem does pay US$20,000 fuh a passport but dem ain’t find out who getting de hog of de money.
When dem boys talk, dem quick to bring lawsuit, but dem boys want dem to know that dem gun defend every lawsuit, and every jumpsuit even if dem got to sell dem underwear. It can be Bai Shaan, Junkshan or Brassingchan, dem boys gun fight dem.
And if dem boys ever run out of cash, which dem doubt will happen, then dem boys gun tun to John Public fuh help and dem one million per cent certain that if dem open dem mouth even de Americans gun help. But dem boys want all dem who suing to know that if dem lose in de court here then dem gun go to de higher court and put dem case before de Creatah.
Talk half, heh heh heh… and watch de sale of Guyana