Jagdeo is a Maths giant
Nov 22, 2018 , Kaieteur News, https://www.kaieteurnewsonline...eo-is-a-maths-giant/
Jagdeo coulda count even before he go into nursery school. Dem boys hear he always good at Maths, so good that he become an economist through dem same figures.
Asgar Ally was he first boss. When Papa Cheddi send him fuh de wuk at de Finance Ministry Asgar interviewed him.
Asgar did interview couple people before. He ask all of dem de same questions—“How much is five and ten?” All of dem seh fifteen. Jagdeo seh “How much you want it to be?”
When Asgar hear that he seh you is de man I want fuh de wuk. Since then he been running Guyana wid a lead pencil. If de number doesn’t suit him he would rub it out and put in what suits him.
The same game he playing up to now wid figures and he not in office.
De AFC put out a statement claiming that dem get de same 10 % votes wha dem get since 2011. Jagdeo look at de statement and seh it look good but that is not de fact.
He do de Maths wid de AFC 8,000 votes and report that it equal four percent. De man was so good he went on to say as a matter of fact it is 3.8%.
Is de same thing he use to do wid de growth rate. When de thing bad he mek it good. He mek Skeldon sugar production look good but he never tell de nation how much money he spend on de factory.
He never tell de people how much dem got to pay back to de Chinee.
This is de same man who get ee friends fuh invest in de Berbice Bridge along wid some taxpayers dollars through NIS.
Dem Mathematics he do on that Bridge is only putting money in he friends and private people pockets.
He suh wicked that he waive de interest that was to be paid for de Govt investments. And this was to mek sure that ee private friends is well taken care of. He then turn back and tek more govt money to pay a subsidy of $300 fuh every car just mek sure a proppa pay check go to ee friends fuh de fat interest rates dem getting. De govt losing twice.
A matter of fact, if y’all don’t know, dem boys seh de Berbice Bridge is only making money to pay de private people.
Talk half and hope he do de Maths fuh check de money he sharing wid he best friend.
