Jagdeo wait till Soulja Bai sick to file no-confidence motion
Nov 16, 2018 , Kaieteur News, https://www.kaieteurnewsonline...o-confidence-motion/
Is one week now since de Fly Jamaica plane mek a crash landing but de people still talking. Dem talking bout dem firemen who rob dem and some of dem talking bout de crash itself.
Dem boys seh Guyana does hardly mek international news. In some countries when people talk bout Guyana some who listening does seh Ghana. But thanks to de firemen nobody ain’t gun mek that mistake again. In fact, de only time Guyana get so much attention was when Jim Jones kill out he whole posse of 918.
One of de Fly Jamaica passenger reach back in Canada and when he talk to some people everybody seh dem would never land in Guyana on a plane. One man seh he gun fly to Suriname then cross backtrack to Guyana because he frighten he gun lose he baggage again.
But most people seh dem would come to Guyana by boat because if anything, dem luggage gun float. Dem ain’t got to worry bout firemen.
Dem ain’t got to worry bout some odda things. De local government elections done; de people vote. Now Jagdeo want to vote again.
He tell dem boys that after Donald serve three years de opposition try to move a vote of no confidence. Soulja Bai done three years suh is time to move a vote of no confidence. He forget de opposition had de majority; he don’t have de majority but he don’t care.
Dem boys seh he had to wait till Soulja Bai sick to mek such a move. That is like stabbing a man in he back and Jagdeo got de nerve to tell people that dem got to debate he no-confidence motion before month end.
All like how de Integrity Commission carrying de Speaker and some MPs to court, Jagdeo got to find somebody who gun table he motion. De Speaker done vex. He seh he would like to see Jagdeo assets. Is not he alone. Dem boys want to see if Jagdeo declare de Chandelier that worth US$500,000 and de properties he got in Queenstown.
Irfaat is anodda one. In five years he get seven property, two alone in Queenstown and a beach house. Dem boys gun talk about that next time.
Talk half and pray Soulja Bai come back quick.