Dem Boys Seh … Airport deal was Jagdeo last haul
Tie Tan was de big ship that sink pun de first trip and kill hundreds. Now dem got Tie Tang. He is not a big ship. He is a big contractor. But dem boys worried because when Tie Tang done wid de airport it might sink like de Tie Tan.
Tie Tang come to Guyana fuh defend de airport scandal. He tell dem boys he is one of de big one fuh de Chinee company who got fuh build de airport. He walk wid four people fuh back he up and de four talk more than he because he, Tie Tang, Tongue Tie.
When dem boys ask he how he and de government arrive at de US$150 million cost, he seh, “Ask you government.” Well Guyana got a government who got more than tie tongue. Dem hand tie, dem foot tie, dem mouth, dem ears block up and dem tail, too.
When dem boys press Tie Tang further he nose open and he seh how he company give a price without any bids and de government accept. Well it was like three-card game. This one you win, this one you lose. Jagdeo pick one and put it pun Robeson mouth.
Tie Tang get vex when dem boys ask bout de secret deal and de corruption, he seh ask you government. Dem involve too. He seh that de government lie too. Dem boys seh that de airport contract was really Jagdeo last haul before he lef de stage.
Luncheon seh that de government reviewing de contract.
Tie Tang seh that he lie.
Dem don’t know ‘bout none review, how de contract done sign and dem wukking.
Tie Tang tell dem boys quietly in a corner how de airport wasn’t only fuh kickbacks and bribes, it is to serve Jagdeo likeness fuh flying. He nah satisfy wid dem li’l plane he want big plane, that does fly easy like Easy Jet.
Dem boys want tell Tie Tang God Bless he and Shay Shay—goodbye.
