Dem boys seh… Minister get nakk aff, tell de nation he resign

Ganga, de Minister, lie so much that even when he get nakk aff, he lie. He ent tell nobody that Donald tell he that he is an embarrassment to de Cabinet.
Donald remind Ganga bout de law volume money, he remind he bout de engineer gyaal and just recently de defence that he put up fuh de recycling plant. Dem boys seh that is de recycling plant argument that really piss Donald off and mek Donald give he de Ganga he marching orders.
When he sehe that he resign, was fuh tek shame out he face and water out he eye. Dem Minister rather lie down pun dem face wid somebody pun dem back. In short, dem would give or tek de unthinkable before dem give up de wuk. Ask Kwame.
Dem boys seh that a lot more of dem got to go, and dem ain’t hear that from Donald; dem hear it from de spirit in he.
Under Jagdeo couple Ministers tender dem resignation but because dem did know too much about him, he beg dem fuh stay on. He couldn’t trust fuh leh dem walk around wid all dem things that dem know about he.
Sam Hinds was one; he resign because he see although dem seh he blind. Luncheon resign because he hear, and dem seh that he deaf.
Thank Gawd Jagdeo not in office today because he woulda keep scampish Ganga fuh have a drink pun he burrday, yesterday.
Ganga did get invite to de burrday. After-all Jagdeo tun 50 without a regular man or a woman by he side. Bobby is a regular by Jagdeo side, but dem boys ent certain wha he is.
Jagdeo plan a big thing; he invite nuff people including hambassadas and low commissionas. All he burrdays he does get drinks and eats lavish. New Thriving is de queen; she does prepare everything in abundance and in huge quantities.
De police and army trucks use to collect food from New Thriving because dem Canter truck wasn’t big enough. This year New Thriving cut back on supplies because dem seh that he de Jagdeo ain’t no president any more.
Dem send bhagee, plain rice, not even fry one, wid some vegetable inside. Dem give he roast poke but nuff of he guest don’t eat pork, including Bobby. Irfaat send home fuh he food from de time he smell de poke. Dem guests complain bitterly. And Jagdeo cry bitterly. To crown it, he ain’t get no gift. Not even dem scampish kantractah ain’t give he no gift.
He call couple of dem but all he get was a message, “This phone no longer accepting calls from your number.”
Banks DIH and DDL use to send lavish, just like New Thriving. Dem two and all realize that Jagdeo is a fraud. Dem send soft drink and Baby Bubbly and Soca. Donald been at de party.
When he see de Baby Bubbly he tell people that he nah want nutten fuh mek belly get upset. De man is a real president. From de time he put he foot down hard, he belly start fuh guh down, he eye start opening up; he ears tekking in and now he mouth letting out. Is from that mouth come de words that send Ganga packing.
Talk half and give thanks because one Ganda egg gone and more to follow.